Dialogu Kosovë-Serbi, sfidë kryesore për qeverinë e re të Kosovës

Procesi i dialogut ndërmjet Kosovës dhe Serbisë ndodhet në një fazë delikate dhe pritet të paraqesë sfidën kryesore për qeverinë e re të Kosovës. Kjo vlerësim vjen nga njohës të zhvillimeve gjeopolitike, të cilët parashikojnë intensifikim të presionit ndërkombëtar për reforma dhe avancim të këtij procesi.

Zhvillimet politike të brendshme në Serbi, si dhe prioritetet globale të partnerëve ndërkombëtarë, mund të ndikojnë drejtpërdrejt në ritmin dhe përmbajtjen e dialogut.

Profesori universitar i shkencave politike Basri Muja vlerësoi se deri tani ka qenë e vështirë të arrihet përparim në dialog, jo vetëm për shkak të faktorëve në Kosovë, por edhe për situatën e paqëndrueshme politike në Serbi. Ai përmendi protestat masive popullore në Serbi, të cilat zgjasin më shumë se një vit, dhe tensionet e brendshme si pengesë për takime substanciale.

"Në situatën në të cilën kemi qenë, fatkeqësisht ka qenë e pamundur që të bëhet diçka me dialog. Kjo nuk ka qenë faji vetëm i Kosovës, sepse në Serbi ka një situatë politike shumë jo-stabile. Atje ka protesta masive popullore tash më shumë se një vit dhe si rezultat institucionet serbe nuk kanë qenë në gjendje të jenë pjesë e debateve apo takimeve substanciale me partnerët nga Kosova", tha Basri Muja.

Ai theksoi se dialogu do të mbetet një nga sfidat kryesore për qeverinë e re. "Çështja e dialogut me Serbinë do të jetë njëra prej sfidave kryesore, por varet shumë nga zhvillimet në Serbi. Sipas informatave, atje do të ketë zgjedhje parlamentare dhe presidenciale kah fundi i vitit dhe unë nuk besoj se deri atëherë institucionet serbe do të angazhohen në debate të thella me partnerët nga Kosova", shtoi profesori.