Trajneri i kombëtares së Francës, Didier Deschamps, ka shënuar një arritje historike në karrierën e tij pas fitores ndaj Irakut në kuadër të Kupës së Botës 2026. Me këtë rezultat, ai ka barazuar rekordin e mbajtur nga legjenda e Gjermanisë Perëndimore, Helmut Schön, për numrin më të madh të fitoreve si trajner në këtë turne, ku të dy numërojnë nga 16 fitore.
Ecuria e Deschamps vlerësohet si tejet efikase, pasi ai e ka arritur këtë kuotë në 21 ndeshje, ndërsa Schön kishte nevojë për 25 ndeshje gjatë katër edicioneve të zhvilluara nga viti 1966 deri në 1978. Deschamps, i cili po merr pjesë në Botërorin e tij të katërt, pritet të largohet nga drejtimi i “Les Bleus” pas përfundimit të këtij edicioni.
Në renditjen e trajnerëve më të suksesshëm pas këtyre dy emrave renditen:
- Luiz Felipe Scolari: 14 fitore në 21 ndeshje
- Mário Zagallo: 13 fitore në 20 ndeshje
- Joachim Löw: 12 fitore në 17 ndeshje
- Óscar Tabárez: 10 fitore në 20 ndeshje
- Carlos Alberto Parreira: 10 fitore në 23 ndeshje
Francezi ka mundësinë të marrë i vetëm kreun e kësaj renditjeje në ndeshjen e radhës kundër Norvegjisë, më 26 qershor, e cila do të përcaktojë fituesin e Grupit I.