Sipas raportit të INSTAT mbi tregun e punës për vitin 2025, diferenca ndërmjet pagave të grave dhe burrave ka vijuar të tkurret, duke shënuar rënie nga 4.9% që ishte një vit më parë. Për periudhën 2014-2019, kjo diferencë ishte dukshëm më e lartë, duke u luhatur mes 10% dhe 11%.
Nga 36 grup-profesione të analizuara, në 33 prej tyre meshkujt rezultojnë me paga më të larta, me diferenca që në raste të caktuara shkojnë deri në 50%. Megjithatë, gratë mbizotërojnë me paga më të larta në tre sektorë kryesorë:
• Drejtuesit administrativë dhe komercialë: Ku gratë paguhen 8% më shumë se burrat.
• Ligjvënësit dhe nëpunësit e lartë të administratës shtetërore: Ku gratë marrin mesatarisht 126 mijë lekë, ose 9% më shumë sesa homologët meshkuj.
• Punëtorët e shërbimit dhe ndihmësit: Ku paga e grave është 52 mijë lekë, ose 3% më e lartë.
Sektori i bujqësisë paraqet diferencën më të madhe në dëm të grave, ku ato paguhen 42 mijë lekë në muaj, krahasuar me 85 mijë lekë që marrin burrat në të njëjtin grup. Po ashtu, në sektorët e shëndetësisë dhe arsimit, burrat paguhen përkatësisht 13% dhe 12% më shumë se gratë.
Profesionet më të paguara në vend mbeten ato drejtuese, me paga mesatare mbi 223 mijë lekë, ndërsa specialistët e teknologjisë së informacionit renditen pas tyre me paga mesatare mbi 170 mijë lekë në muaj. Në fund të listës së të ardhurave qëndrojnë punonjësit e shërbimeve rrugore dhe ata të bujqësisë, me paga nën 50 mijë lekë.