Në Shqipëri, paga mesatare mujore bruto arriti 84 mijë lekë në vitin 2025, duke u rritur me 8.6% krahasuar me vitin 2024. Kjo rritje u reflektua pothuajse në të gjitha sektorët ekonomikë dhe profesione, por disa prej tyre përfituan më shumë nga zhvillimet ekonomike.
Sektorët më të paguar
Sipas aktiviteteve ekonomike, financat dhe sigurimet mbeten sektori më i paguar, me pagë mesatare 161 mijë lekë në muaj dhe rritje 6.3%.
Teknologjia e informacionit dhe komunikacionit paguan mesatarisht 127 mijë lekë, me rritje 8.5%, për shkak të zhvillimeve teknologjike dhe mungesës së specialistëve.
Administrata publike dhe mbrojtja arritën për herë të parë 100 mijë lekë në muaj, duke u renditur si sektori i tretë më i paguar, me rritje 9.2%.
Pasuritë e paluajtshme kanë pagë mesatare rreth 90 mijë lekë, të lidhura me zhvillimet në ndërtim, ku të rinjtë tërhiqen nga kthimet e shpejta në shit-blerje apartamentesh.
Rritjet më të larta në përqindje
Në terma përqindjeje, ndërtimi regjistroi rritjen më të madhe prej 14%, duke arritur rreth 69 mijë lekë në muaj, për shkak të kërkesës së lartë nga boomi i ndërtimeve.
Rritje të larta pati edhe sektori i tregtisë, transportit, akomodimit dhe shërbimit ushqimor (turizmi), ku paga mesatare arriti gati 69 mijë lekë, me rritje të konsiderueshme.