Një kamion me targa të Kosovës është përfshirë nga flakët ditën e djeshme në kilometrin e fundit të Rrugës së Kombit, në afërsi të Pikës Kufitare të Morinës. Mjeti, i cili transportonte materiale drusore për industrinë e mobilieve, mori flakë fillimisht në zonën e gomave të karrocerisë.
Flakët dëmtuan pjesën e pasme të karrocerisë si dhe tendën mbuluese të ngarkesës. Ndërhyrja e menjëhershme e drejtuesit të mjetit, e mbështetur nga kolegët dhe banorët e zonës, bëri të mundur shuarjen e zjarrit dhe parandalimin e përhapjes së tij të mëtejshme.
Edhe pas kalimit të më shumë se 24 orëve nga ngjarja, karroceria e kamionit vijon të qëndrojë e palëvizur në njërën korsi të aksit rrugor. Ky qëndrim i mjetit në rrugë ka sjellë vështirësi për qarkullimin e automjeteve, veçanërisht duke pasur parasysh fluksin e lartë të lëvizjeve që karakterizon sezonin veror në drejtim të pikës kufitare të Morinës.