Ministri në detyrë i Infrastrukturës dhe Transportit të Kosovës, Dimal Basha, zhvilloi një takim zyrtar në Tiranë me homologun e tij nga Shqipëria, ministrin e Infrastrukturës dhe Energjisë, Enea Karakaçi. Në qendër të këtij takimi ishte shqyrtimi i mundësive dhe angazhimi për jetësimin e projektit të hekurudhës që do të lidhë Durrësin me Prishtinën.
Gjatë takimit, ministri Basha shprehu përkushtimin e plotë të institucioneve të Kosovës për realizimin e këtij projekti strategjik, pavarësisht sfidave dhe kostove financiare që ai mbart. Palët u dakorduan se ndërtimi i kësaj linje hekurudhore, me impakt për tërë Evropën Juglindore, do të shërbejë si një korridor i ri zhvillimi dhe si lidhje e mëtejshme kombëtare mes dy vendeve.
Sipas përfaqësuesve, ky projekt do të ndikojë drejtpërdrejt në afrimin e qytetarëve, rritjen e potencialit ekonomik dhe lehtësimin e qarkullimit të mallrave. Të dy ministrat e cilësuan nismën si një investim me rëndësi për të ardhmen e përbashkët të dy vendeve.