Ministri i Infrastrukturës dhe Energjisë, Enea Karakaçi, prezantoi në seancën plenare projektligjin për ratifikimin e marrëveshjes së huas me Bankën Evropiane për Rindërtim dhe Zhvillim (BERZH). Kjo marrëveshje synon përmbylljen e paketës financiare për rehabilitimin e hekurudhës Tiranë-Durrës dhe lidhjen me Aeroportin Ndërkombëtar të Tiranës.
Sipas ministrit Karakaçi, investimi do të mundësojë elektrifikimin e plotë të linjës, krijimin e infrastrukturës energjetike dhe certifikimin e saj sipas standardeve të Bashkimit Evropian. Gjatë diskutimeve, ministri sqaroi se punimet civile kanë përfunduar, sistemet e sinjalizimit janë drejt finalizimit, ndërsa stacionet e reja janë në proces ndërtimi. Miratimi i kësaj marrëveshjeje shënon nisjen e fazës së elektrifikimit, e cila parashikohet të përfundojë deri në fund të vitit 2027.
Çështja u diskutua pas pyetjeve të deputetit të partisë “Mundësia”, Erald Kapri, i cili kërkoi sqarime mbi afatet e këtij projekti dhe theksoi nevojën për një shërbim hekurudhor funksional.
Përveç këtij segmenti, ministri bëri të ditur se qeveria po punon edhe për projekte të tjera hekurudhore, duke përfshirë:
• Zgjatimin e hekurudhës drejt stacionit qendror të Tiranës;
• Ndërtimin e sistemit të mirëmbajtjes së trenave;
• Rikonstruksionin e linjës Vorë-Shkodër-Hani i Hotit.