Ka hyrë në ditën e saj të 17-të protesta jopartiake në kryeqytet. Qytetarët janë grumbulluar në sheshin ‘Skënderbej’ dhe më pas kanë marshuar përgjatë bulevardit ‘Dëshmorët e Kombit’ për t'u stacionuar para godinës së Kryeministrisë.
Nismëtari i protestës, Alben Kola, deklaroi se lëvizja do të vijojë të jetë paqësore dhe sqaroi se qëndrimi i tyre nuk është kundër partive politike, por kundër kryetarëve të tyre. Gjithashtu, ai njoftoi se ditën e sotme hapësira për fjalime i është lënë ekskluzivisht të rinjve.
Një student i Gazetarisë, në emër të protestuesve, u shpreh se nëse kërkesat e tyre nuk dëgjohen, ata janë të gatshëm të flenë te shkallët e institucionit deri në dorëheqje. Drejtuesit e protestës po shqyrtojnë mundësinë e qëndrimit ditë-natë për shkak të indiferencës së kryeministrit.
Për të rritur pjesëmarrjen, organizatorët njoftuan se duke filluar nga nesër, ora e grumbullimit do të zhvendoset në orën 19:00.