Ish-ministri i Jashtëm, Ditmir Bushati, ka reaguar përmes një shkrimi në rrjetet sociale në lidhje me protestat e fundit në vend. Reagimi i tij vjen si përgjigje ndaj deklaratave të kryeministrit Edi Rama, i cili më herët kishte vënë në pikëpyetje natyrën e protestave, duke përmendur ndikimin e algoritmeve dhe faktorëve të jashtëm.
Në mesazhin e tij, Bushati theksoi se qytetarët nuk janë të nxitur nga Irani dhe as nga algoritmet, por janë shqiptarë të revoltuar nga trajtimi i atdheut si plaçkë. Ai e cilësoi si të dëmshme aleancën ndërmjet politikës, oligarkisë, medias dhe krimit të organizuar, duke shtuar se protestuesit nuk kërkojnë kaos, por më shumë drejtësi, dinjitet, shpresë dhe mundësi për të gjithë.
Sipas ish-ministrit, ngjarjet e fundit dëshmojnë se koncepti i një “Shqipërie të Re” nuk është thjesht një aspiratë, por një kapitull i pashmangshëm që duhet përqafuar. Ai u bëri thirrje faktorëve përgjegjës për reflektim të thellë, urtësi dhe përgjegjësi politike e shoqërore, duke theksuar se vendi meriton më shumë.