Presidenti i Shteteve të Bashkuara, Donald Trump, gjatë një konference për shtyp në Shtëpinë e Bardhë, u shpreh optimist për ecurinë e negociatave me Iranin. Ai deklaroi se bisedimet po zhvillohen "shumë mirë" dhe se palët janë "shumë afër nënshkrimit të dokumenteve", duke lënë të kuptohet se një marrëveshje mund të finalizohet këtë fundjavë.
Në të kundërt, Ministri i Jashtëm i Iranit, Abbas Araghchi, ofroi një version tjetër të situatës në një intervistë për median Al Mayadeen. Ai theksoi se nuk ka pasur "asnjë përparim të rëndësishëm" dhe se nuk ekziston një proces formal negociatash midis dy vendeve. Megjithatë, Araghchi konfirmoi se kanalet e komunikimit mbeten të hapura dhe se po shkëmbehen mesazhe, ku një ndër temat kryesore është parandalimi i një sulmi izraelit ndaj Bejrutit.
Paralelisht, kryeministri i Izraelit, Benjamin Netanyahu, u kundërpërgjigj ndaj kritikave të liderëve evropianë për operacionet ushtarake të vendit të tij. Ai hodhi poshtë këto qëndrime, duke deklaruar se ata "nuk kanë guximin të luftojnë barbarët". Ndërkaq, Përfaqësuesja e Lartë e Bashkimit Evropian, Kaja Kallas, ka hedhur në tryezë propozimin që misioni detar i BE-së të marrë rolin kryesor në operacionet e pastrimit të minave në Ngushticën e Hormuzit.