Presidenti i Shteteve të Bashkuara, Donald Trump, njoftoi arritjen e një dakordësie për përfundimin e luftës me Iranin, duke e cilësuar këtë hap si një moment historik që garanton se Teherani nuk do të zotërojë kurrë armë bërthamore. Sipas kreut të Shtëpisë së Bardhë, negociatat janë në fazën e finalizimit të dokumenteve, ndërsa procesi pritet të zyrtarizohet gjatë fundjavës në një ceremoni në Evropë.
Trump theksoi se marrëveshja përfshin angazhimin e palës iraniane për të mos zhvilluar dhe për të mos blerë armë bërthamore. Ky hap pritet të sjellë rihapjen e Ngushticës së Hormuzit, një korridor jetik për transportin global të naftës, si dhe kthimin e trupave amerikane në atdhe. Në ceremoninë e nënshkrimit, Shtetet e Bashkuara do të përfaqësohen nga nënpresidenti JD Vance.
Nga ana tjetër, zëdhënësi i Ministrisë së Jashtme të Iranit, Esmaeil Baghaei, ka mbajtur një qëndrim më të rezervuar, duke deklaruar se deri në këtë moment, Teherani ende nuk ka marrë një vendim përfundimtar mbi tekstin e marrëveshjes.
Kryeministri i Izraelit, Benjamin Netanyahu, ka vlerësuar angazhimin e presidentit Trump. Megjithëse Izraeli nuk është palë në këtë memorandum, zyra e kryeministrit izraelit njoftoi se Netanyahu është informuar për detajet, duke kërkuar që marrëveshja përfundimtare të përfshijë eliminimin e materialeve të pasuruara, çmontimin e infrastrukturës bërthamore, kufizimin e programit të raketave dhe ndërprerjen e mbështetjes iraniane për bashkëpunëtorët e tij.