Enkeleid Dobi, ish-futbollist dhe trajner shqiptar, ka dhënë komente për mediat polake në prag të ndeshjes mes Polonisë dhe Shqipërisë.
50-vjeçari pret një ndeshje të fortë dhe të kujdesshme nga të dyja skuadrat. Sipas tij, një nga pikat kyçe për kombëtaren shqiptare do të jetë mesfushori ofensiv Ernest Muçi.
Dobi u shpreh se Muçi është në formë shumë të mirë dhe paraqet kërcënim real për mbrojtjen polake. "Do të doja të luante Muçi, sepse është një nga lojtarët tanë më të mirë aktualisht. Është në formë, shënon dhe asiston, ndaj besoj se do ta nisë nga minuta e parë", deklaroi ai.
Në analizën e tij, Dobi vlerësoi organizimin mbrojtës të Shqipërisë, duke thënë se kuqezinjtë janë të vështirë për t’u çarë. Megjithatë, ai paralajmëroi për rrezikun nga emrat e mëdhenj të Polonisë, si Robert Lewandowski dhe Piotr Zieliński, të cilët mund të bëjnë diferencën në çdo moment.
Ai përmendi se që nga momenti kur drejtimin e ka marrë Jan Urban, kombëtarja polake është stabilizuar. "Ka balancë dhe loja është më e organizuar. Nuk ka më probleme apo polemika si më parë, çka e bën ekipin më të fortë", shtoi Dobi. Sipas tij, Polonia është favorite në raport 60-40, por Shqipëria ka shanset për të surprizuar.