Dogana e Kosovës dënoi ashpër kërcënimin e drejtuar ndaj një zyrtari të lartë, menaxher i nivelit të lartë, nga përfaqësuesi i autorizuar i një subjekti të madh që operon në tregtimin me shumicë dhe pakicë të derivateve të naftës. Ngjarja ndodhi më 23 mars 2026, gjatë verifikimeve zyrtare për një kontingjent me derivate.
Gjatë kontrollit, u identifikuan elemente të dyshimta në dokumentacion, përfshirë parametrat e transaksionit dhe vlerën e deklaruar, bazë për përllogaritjen e detyrimeve doganore. Në kuadër të mandatit ligjor, Dogana e Kosovës ushtron kontrolle të plota për të garantuar zbatimin e ligjit dhe saktësinë e deklarimeve.
Në reagimin zyrtar, Dogana theksoi se çdo përpjekje për të frikësuar, penguar apo ndikuar zyrtarët gjatë detyrës përbën sulm të drejtpërdrejtë ndaj rendit ligjor, autoritetit të shtetit dhe funksionimit të institucioneve publike. Kërcënime të tilla janë të papranueshme dhe nuk do të tolerohen.
Rasti u paraqit te organet kompetente, me pritje për trajtim të shpejtë, të paanshëm dhe të plotë, që përgjegjësit të përballen me pasojat ligjore. Menaxhmenti shprehu mbështetje të plotë për zyrtarët në ushtrimin e detyrave profesionale.
Dogana e Kosovës rithekson se do të vazhdojë zbatimin e përgjegjësive kushtetuese dhe ligjore, duke mbrojtur interesin publik, konkurrencën e ndershme dhe trajtimin e barabartë të operatorëve ekonomikë.