Gjatë kontrollit të kryer në Pikën e Kalimit Kufitar në Kullë, zyrtarët e Doganës së Kosovës kanë ndaluar një pajisje të dyshuar si dylbi për pushkë snajper. Pajisja është gjetur brenda një automjeti me targa të huaja, të drejtuar nga një shtetas i Republikës së Kosovës, i cili nuk e kishte deklaruar atë. Ndaj personit është iniciuar procedurë kundërvajtëse dhe administrative, ndërsa pajisja është ndaluar në përputhje me legjislacionin për sigurinë publike.
Në një rast tjetër, më 18 gusht 2026, zyrtarët doganorë në pikëkalimin kufitar Dheu i Bardhë kanë zbuluar mjete monetare të padeklaruara dhe të fshehura. Gjatë kontrollit janë gjetur 12,570 euro dhe 5,900 franga zvicerane, të cilat kapin një vlerë totale prej 18,841.74 euro sipas kursit të këmbimit. Mjetet monetare janë ndaluar, ndërsa rasti ka kaluar për trajtim të mëtejshëm nga njësitë kompetente.
Dogana e Kosovës u ka bërë thirrje qytetarëve për respektimin e detyrimeve ligjore, duke rikujtuar se çdo person që hyn ose del nga territori i vendit është i detyruar të deklarojë mjetet monetare, instrumentet e negociueshme, si dhe metalet apo gurët e çmuar, nëse vlera e tyre arrin ose tejkalon shumën prej 10,000 euro.