Zyrtarët e Doganës së Kosovës, gjatë kontrolleve rutinore në Aeroportin Ndërkombëtar Adem Jashari, kanë parandaluar futjen e një arme ajrore të padeklaruar, e cila është e ndaluar për import. Rasti u evidentua kur një udhëtar, pasi kaloi nëpër kanalin e gjelbër me pretendimin se nuk kishte mallra për të deklaruar, u përzgjodh nga autoritetet për një kontroll të detajuar të bagazhit përmes pajisjes së skanimit.
Pas dyshimeve të ngritura nga imazhet e skanerit, zyrtarët doganorë kryen kontrollin fizik të bagazhit. Gjatë këtij procesi, u gjet një revole ajrore e markës FB Record, e kalibrit .177. Për të shmangur zbulimin, arma ishte çmontuar dhe ishte mbështjellë me foli alumini dhe rroba.
Arma është sekuestruar dhe i është dorëzuar Policisë Kufitare në Aeroportin e Prishtinës për veprime të mëtejshme. Ndaj udhëtarit do të zhvillohen procedurat administrative dhe ligjore në përputhje me legjislacionin në fuqi. Dogana e Kosovës konfirmoi se do të vazhdojë bashkëpunimin me institucionet kompetente për mbrojtjen e kufijve dhe parandalimin e futjes së mallrave të ndaluara, duke garantuar sigurinë e qytetarëve.