Zyrtarët e Doganës së Kosovës kanë parandaluar futjen e paligjshme të 200 kg mish dyneri në territorin e vendit. Ngjarja ndodhi të premten mbrëma rreth orës 18:20 në pikëkalimin kufitar Glloboçicë.
Gjatë kontrollit të një automjeti udhëtarësh, zyrtarët gjetën dhjetë rrotulla mish dyneri me peshë nga 20 kg secila. Shoferi kishte deklaruar se nuk transportonte mallra, ndërsa malli me vlerë të përafërt 800 euro ishte vendosur pa frigorifer dhe pa kushte higjienike.
Dogana thekson se transporti i tillë shmangej edhe kontrollin e detyrueshëm sanitar nga Agjencia e Ushqimit dhe Veterinarisë. Malli është sekuestruar dhe do t’i nënshtrohet trajtimit ligjor.
Ndaj drejtuesit të automjetit ka filluar procedurë kundërvajtëse. Dogana e Kosovës u bën apel qytetarëve dhe bizneseve që të shmangin kontrabandën dhe aktivitetet joformale.