Gjatë kontrolleve të rregullta në një depo doganore të autorizuar në rajonin e Mitrovicës, zyrtarët e Doganës së Kosovës kanë identifikuar parregullsi në administrimin e mallrave. Kontrolli i kryer përmes verifikimit të dokumentacionit dhe inventarizimit fizik nxori në pah shkelje të kushteve të autorizimit doganor.
Sasia e produkteve ushqimore me bazë yndyre bimore, të cilat kishin tejkaluar afatin e përdorimit, rezultoi të jetë 19,875 kilogramë. Për menaxhimin e kësaj situate, Dogana e Kosovës njoftoi Agjencinë e Ushqimit dhe Veterinarisë (AUV). Pas inspektimit, përfaqësuesit e AUV-së konfirmuan gjendjen e mallrave dhe urdhëruan asgjësimin e tyre, në përputhje me procedurat ligjore në fuqi.
Në të njëjtën kohë, gjatë inventarizimit fizik, zyrtarët doganorë identifikuan një mospërputhje midis gjendjes së raportuar në dokumentacion dhe asaj faktike. Në depo mungonin 5,450 kilogramë mallra, për të cilat nuk u gjetën gjurmë gjatë kontrollit fizik. Mallrat e skaduara janë transferuar në hapësirat e përcaktuara nga autoritetet doganore, ku do të qëndrojnë deri në përfundimin e procesit të asgjësimit.
Autoritetet doganore konfirmuan se kanë iniciuar procedura administrative dhe hetimore për të zbardhur rrethanat e kësaj mungese stoku dhe për të përcaktuar përgjegjësitë ligjore të subjekteve të përfshira.