Gjatë ushtrimit të kontrolleve të rregullta në Pikën e Kalimit Kufitar në Jarinjë, zyrtarët e Doganës së Kosovës kanë ndaluar për kontroll një autobus të linjës së rregullt ndërkombëtare. Gjatë inspektimit të bagazheve, është identifikuar një valixhe që përmbante një sasi të konsiderueshme barnash të padeklaruara, të cilat nuk shoqëroheshin me dokumentacionin përkatës.
Sasia e sekuestruar përbëhet nga gjithsej 7,168 njësi, të ndara si më poshtë:
• 7,100 kapsula;
• 68 produkte të tjera (shurupe, sprej dhe xhel).
Duke qenë se asnjë nga pasagjerët nuk e ka pranuar pronësinë mbi bagazhin në fjalë, Dogana e Kosovës ka iniciuar procedurë kundërvajtëse ndaj kompanisë transportuese, në përputhje me dispozitat e Ligjit Nr. 08/L-247 (Kodi Doganor dhe i Akcizave). Kompania mban përgjegjësinë për transportin e mallrave në rastet kur pronari nuk identifikohet.
Institucioni doganor theksoi se veprimet e mëtejshme procedurale janë ndërmarrë për të parandaluar hyrjen e produkteve me origjinë të padokumentuar, të cilat mund të përbëjnë rrezik për shëndetin publik. Dogana rikujtoi se mosdeklarimi i mallrave përbën shkelje ligjore dhe është subjekt i masave administrative.