Gjatë procedurave të zhdoganimit në Zyrën e Brendshme Doganore në Vërmicë, zyrtarët e Doganës së Kosovës identifikuan një sasi malli të padeklaruar nga importuesi. Përzgjedhja e ngarkesës për kontroll u realizua përmes zbatimit të kritereve të analizës së riskut.
Pas krahasimit të dokumentacionit me gjendjen faktike, autoritetet gjetën sasi të radarëve për sisteme kundër vjedhjes, vlera e të cilëve është përllogaritur në 2,050 euro.
Dogana e Kosovës njoftoi se ky veprim përbën kundërvajtje doganore në pajtim me Kodin Doganor dhe të Akcizave Nr. 08/L-247, pasi synon shmangien e detyrimeve të importit. Institucioni rikonfirmoi përkushtimin për mbrojtjen e tregtisë së ligjshme dhe sigurimin e konkurrencës së drejtë në tregun e vendit.