Dokumente të reja të publikuara nga Departamenti i Drejtësisë i SHBA-së tregojnë se Jeffrey Epstein, i dënuari për abuzim seksual, kishte kërkuar vazhdimisht të kontaktonte udhëheqës të lartë rusë, përfshirë presidentin Vladimir Putin dhe ministrin e Jashtëm Sergey Lavrov.
Sipas këtyre dokumenteve, Epstein përdorte ndërmjetës si politikani norvegjez Thorbjørn Jagland, ish-sekretar i përgjithshëm i Këshillit të Evropës. Në 24 qershor 2018, rreth një vit pas vdekjes së ambasadorit rus në Kombet e Bashkuara Vitaly Churkin, Epstein i dërgoi një email Jagland-it: "Mendoj se mund t’i sugjeroni Putin-it që Lavrov-i të flasë me mua. Vitaly Churkin e bëri, por ai vdiq."
Jagland u përgjigj se do të takohej me asistentin e Lavrov-it dhe do ta sugjeronte çështjen. Epstein iu përgjigj duke thënë se Churkin ishte "i shkëlqyer" dhe e kishte kuptuar Donald Trump-in pas bisedave të tyre, duke e cilësuar çështjen si të thjeshtë. Dokumentet nxjerrin në pah se Epstein takohej rregullisht me Churkin në Nju Jork dhe i kishte ofruar ndihmë djalit të tij, Maxim, për një punë në një firmë menaxhimi pasurie.
Epstein pretendonte lidhje të afërta me diplomatë rusë, mburrje me kontakte perëndimore dhe ofronte këshilla për investime, duke synuar të paraqitej si figurë me ndikim gjeopolitik. Ai kishte udhëtuar disa herë në Rusi, kishte marrëdhënie me figura ruse të biznesit dhe sigurisë, dhe kërkoi zgjatje vizë ruse pak para arrestimit në 2019. Nuk ka prova për takime reale me Putin-in, sipas CNN-së.
Publikimi ka nxitur spekulime dhe hetime. Kryeministri polak Donald Tusk njoftoi në një mbledhje të kabinetit se Polonia do të hetojë lidhjet e mundshme të Epstein-it me shërbimet ruse të inteligjencës. Kremlini i ka hedhur poshtë pretendimet, ndërsa analistët vlerësojnë se Epstein synonte kryesisht prestigj dhe afërsi me pushtetin.