Presidenti i SHBA-së, Donald Trump, njoftoi se transporti detar në Ngushticën e Hormuzit ka rinisur, duke shënuar një zhvillim pozitiv pas bllokadës së vendosur gjatë konfliktit me Iranin. Përmes një postimi në rrjetet sociale, kreu i Shtëpisë së Bardhë theksoi se shumë anije të ngarkuara me naftë po shfrytëzojnë tashmë kalimin jugor, të cilin e cilësoi si “absolutisht të sigurt, të mbrojtur dhe të pastër”.
Ky njoftim pason thirrjet e mëparshme të Trump drejtuar operatorëve detarë për të rifilluar aktivitetin, me premtimin se kjo rrugë strategjike do të jetë pa tarifa kalimi. Para nisjes së konfliktit, kjo nyje jetike për tregun global të energjisë përballonte mesatarisht mbi 100 anije në ditë.
Sipas informacioneve, hapja e këtij korridori po ndodh në kuadër të përpjekjeve diplomatike për t’i dhënë fund luftimeve. Donald Trump bëri të ditur se qasja në ngushticë pritet të zyrtarizohet plotësisht të premten, ditë kur parashikohet edhe nënshkrimi i marrëveshjes përkatëse mes SHBA-së dhe Iranit.