Zëvendëskryeministri i Maqedonisë së Veriut, përgjegjës për Qeverisjen e Mirë, Arben Fetai, ka dhënë dorëheqjen nga posti i tij. Lajmin e bëri të ditur vetë Fetai përmes një njoftimi në rrjetin social Facebook, ku e cilësoi vendimin si të mirëmenduar dhe të marrë me bindjen se në rrethanat aktuale kjo është gjëja më e drejtë dhe dinjitoze.
Largimi i tij vjen pas një periudhe të shoqëruar me polemika për mungesat e tij të gjata në aktivitetet qeveritare. Sipas raportimeve, ai nuk ishte paraqitur në detyrë prej muajsh, ndërsa aktivitetet e fundit publike të Fetait datonin që nga muaji mars. Vëmendja ndaj kësaj çështjeje u shtua ndjeshëm pasi ai mungoi në seancën e pyetjeve të deputetëve më 18 maj, ndonëse pjesëmarrja e tij ishte paralajmëruar paraprakisht. Në opinionin publik u ngritën gjithashtu pikëpyetje nëse zyrtari vazhdonte të përfitonte pagë nga buxheti i shtetit pavarësisht mungesave.
Kryeministri Hristijan Mickoski kishte deklaruar më herët se kishte zhvilluar biseda me Fetain lidhur me këtë situatë. Sipas kryeministrit, zëvendëskryeministri kishte shprehur prej kohësh dëshirën për t’u larguar nga Qeveria dhe për t’u rikthyer në Bruksel, ku kishte pasur angazhime profesionale përpara marrjes së detyrës në ekzekutiv. Mickoski pranoi se do të zhvillonte një takim sqarues për të diskutuar çështjet që lidhen me pjesëmarrjen e tij, por dorëheqja u dorëzua zyrtarisht pak ditë më vonë.