Zëvendëskryeministri për Qeverisje të Mirë në Qeverinë e Maqedonisë së Veriut, Arben Fetai, ka njoftuar sot zyrtarisht dorëzimin e dorëheqjes te kryeministri. Lajmi u bë i ditur përmes një njoftimi të publikuar nga vetë Fetai në rrjetin social Facebook.
Në deklaratën e tij, Arben Fetai reflektoi mbi angazhimin e tij gjatë dy viteve të fundit, duke nënvizuar kontributin në reformat për forcimin e shtetit të së drejtës, transparencën dhe llogaridhënien institucionale. Ai e përshkroi misionin e tij si "sa të rëndësishëm aq edhe jofalënderues".
"A jam plotësisht i kënaqur me atë që kemi arritur? Sigurisht që jo. Gjithmonë ka hapësirë për më shumë, për më mirë dhe për më shpejt. Por a kam punuar me përkushtimin maksimal për të vendosur themele të shëndosha mbi të cilat mund të ndërtohet më tej? Pa asnjë mëdyshje, po", deklaroi Fetai.
Ai theksoi se dorëheqja është një vendim i mirëmenduar, i marrë me bindjen se në rrethanat aktuale, ky është veprimi më i drejtë dhe më dinjitoz.