Ferit Hoxha u betua këtë të premte, më 6 mars 2026, si ministër për Evropën dhe Punët e Jashtëm para Presidentit Bajram Begaj. Pas betimit, ai publikoi një reagim në llogarinë e tij në rrjetin social X.
Në postim, Hoxha shprehu nderin e madh për marrjen e kësaj përgjegjësie. Ai theksoi se karriera e tij më shumë se tre dekada e gjysmë si nëpunës publik dhe anëtar i Shërbimit të Jashtëm e ka përgatitur për këtë detyrë. Hoxha falënderoi Kryeministrin Edi Rama dhe Presidentin Bajram Begaj për besimin e dhënë, duke e cilësuar si privilegj të madh dhe detyrim të lartë ndaj shtetit dhe qytetarëve shqiptarë.
Ai vuri në dukje përvojën e tij në përfaqësimin e flamurit kuq e zi në organizata ndërkombëtare dhe kryeqytete të rëndësishme. Kjo përvojë, sipas tij, i ka dhënë mundësinë të vërejë rritjen e peshës dhe besueshmërisë së Shqipërisë në arenën ndërkombëtare, ku zëri i vendit dëgjohet me më shumë respekt dhe vëmendje.
Hoxha premtoi se së bashku me kolegët në Shërbimin e Jashtëm dhe institucionet përkatëse do të punojë për zbatimin e përparësive të programit qeveritar në politikën e jashtme. Në zemër të këtij programi qëndron procesi i pakthyeshëm i anëtarësimit të Shqipërisë në Bashkimin Evropian. Punën do ta udhëheqë përkushtimi, përgjegjësia dhe besimi në potencialin e vendit, me parimin e interesit kombëtar si udhërrëfyes, për ta bërë Shqipërinë më të respektuar, më të dëgjuar dhe më të suksesshme në hapësirën euroatlantike dhe arenën globale.