Ferit Hoxha, ministër për Evropën dhe Punët e Jashtme, zhvilloi bashkëbisedime me të rinj në kuadër të turit “BE dhe Ti: Evropa fillon këtu”. Më 5 maj në Koplik të Malësisë së Madhe, ai u takua me nxënës të gjimnazit “Sherif Hoxha”.
Gjatë takimit në Koplik, Hoxha u ndal te rëndësia e Bashkimit Evropian si projekti më i suksesshëm i paqes, solidaritetit dhe bashkëpunimit në historinë moderne. Ai e cilësoi BE-në si hapësirë konkrete mundësish për zhvillim, dije dhe fuqizim të potencialit njerëzor. Theksoi se rruga euroatlantike e Shqipërisë është zgjedhje e qartë dhe e qëndrueshme, ndërsa vlerat si liria, demokracia, solidariteti dhe respekti për të ndryshmen përbëjnë bazën e përbashkët me ato evropiane.
Ministri vlerësoi procesin e integrimit si gjithëpërfshirës, që kërkon angazhimin e të gjithëve, me rol thelbësor për brezin e ri përmes dijes, ideve dhe talentit. “Sot, kur perspektiva e anëtarësimit të Shqipërisë në BE është më konkrete se kurrë, ky mbetet një proces gjithëpërfshirës: askush nuk është jashtë tij dhe secili ka një rol për të luajtur”, deklaroi ai.
Bashkëbisedimi në Shkodër
Më 6 maj, Hoxha zhvilloi bashkëbisedim me studentët e Universitetit “Luigj Gurakuqi” në Shkodër. Ai i cilësoi të rinjtë si fytyrën e Shqipërisë moderne dhe ambicioze, si dhe forcën shtytëse të ndryshimit në procesin e integrimit.
Hoxha nënvizoi se anëtarësimi në BE nuk është vetëm proces teknik negociatash, por transformim i thellë që prek jetën e përditshme: arsim më cilësor dhe të hapur ndaj botës, sistem drejtësie më të fortë e të drejtë, më shumë mundësi në tregun e punës dhe standarde më të larta jetese. Për të rinjtë, BE-ja ofron mundësi për studime, programe shkëmbimi, punësim dhe zhvillim profesional brenda dhe jashtë vendit, liri lëvizjeje dhe bashkëpunim në hapësirën evropiane, ku vlerësohen dijet, aftësitë dhe përkushtimi pavarësisht kombësisë.
Ai rikujtoi rolin e të rinjve 36 vite më parë në përmbysjen e diktaturës dhe theksoi se sot ata kanë rol kyç në ndërtimin e Shqipërisë evropiane dhe realizimin e vizionit Shqipëria 2030. Procesi, sipas tij, kërkon përkushtim, besim, durim dhe pjesëmarrjen e secilit, me punë konkrete të vlerësuara nga partnerët evropianë.