Ministri për Evropën dhe Punët e Jashtme, Ferit Hoxha, së bashku me ministrën e Shtetit për Administratën Publike dhe Antikorrupsionin, Adea Pirdeni, zhvilluan një takim me nxënës të Gjimnazit "Naim Frashëri" dhe studentë të Universitetit "Aleksandër Moisiu" në Durrës, më 7 prill 2026.
Ky aktivitet u zhvillua në kuadër të turit kombëtar "BE dhe Ti: Europa Fillon Këtu", që synon të fuqizojë dialogun midis institucioneve dhe të rinjve për ndërtimin e një të ardhmeje europiane për Shqipërinë.
Gjatë takimit, të rinjtë shprehën interes të lartë për reformat, pritshmëritë, avantazhet e integrimit europian, imazhin e Shqipërisë dhe rolin e tyre në krijimin e një vendi modern dhe europian.
Ferit Hoxha u përgjigj pyetjeve të tyre, duke theksuar pjekurinë, qartësinë dhe ambicien që ata treguan.
Ai nënvizoi se rruga e Shqipërisë drejt Bashkimit Evropian është e pandashme nga energjia, vizioni dhe angazhimi i të rinjve, që përbëjnë një garanci të fortë për një të ardhme europiane të pakthyeshme.
Sipas Hoxhës, ky dialog rrit njohuritë e të rinjve mbi BE-në, i përfshin ata në proceset vendimmarrëse dhe promovon vlerat demokratike.
Turi do të vazhdojë në qytete të tjera të Shqipërisë, me diskutime të ngjashme me brezin e ri.