Ish-drejtori i Lotarisë Shtetërore, Përparim Bajrami, i cili kërkohej nga organet e drejtësisë, është paraqitur vullnetarisht mëngjesin e sotëm pranë organeve kompetente. I lindur më 10 shkurt 1993 në Kumanovë, Bajrami u paraqit në këmbë në orën 05:35, duke i dhënë fund arratisë së tij që prej vitit 2024. Ndaj tij ishte lëshuar një fletarrestim ndërkombëtar në përputhje me nenin 354, paragrafi 5 të Kodit Penal. Pas konfirmimit të masës, ai është privuar nga liria dhe pritet të përballet me procedurat e mëtejshme gjyqësore.
Hetimet për keqpërdorimet
Prokuroria Themelore Publike në Shkup ka ngritur aktakuzë ndaj 8 personave në lidhje me keqpërdorimet në Lotarinë Shtetërore gjatë viteve 2023 dhe 2024. Përveç Bajramit, në këtë çështje janë përfshirë edhe ish-zëvendëskryeministri Artan Grubi dhe ish-sekretari i përgjithshëm i Qeverisë, Metodija Dimovski.
Sipas hetimeve, dyshohet se janë kryer shkelje në prokurimet publike për pajisje teknologjike si printerë, televizorë dhe pajisje kompjuterike, të cilat pavarësisht se figuronin si të pranuara në dokumente, nuk janë gjetur në magazinat e institucionit. Artan Grubi, i cili gjithashtu ishte në arrati, u dorëzua në pikën kufitare të Bllacës në shkurt të vitit 2026 dhe aktualisht ndodhet nën masën e arrestit shtëpiak. Seanca gjyqësore për këtë rast është planifikuar të mbahet këtë të premte.