Gjykata e Kasacionit në Itali ka pranuar pjesërisht ankesën e Prokurorisë lidhur me vendimin për Cristiano Mossali-n, 56-vjeçarin nga Capriolo, i cili është gjetur fajtor për vrasjen e Nexhat Ramës në vitin 2022. Sipas hetimeve, viktima u qëllua për vdekje në servisin e autorit pas një konflikti lidhur me një borxh prej 30 mijë eurosh, ndërsa më pas trupi i tij u dogj brenda automjetit në një zonë rurale.
Në procesin e shkallës së parë, Mossali u dënua me 27 vjet burg për vrasje me paramendim. Megjithatë, Gjykata e Apelit në Brescia e uli dënimin në 14 vjet, me argumentin se paramendimi nuk ishte provuar mjaftueshëm. Vendimi i fundit i Kasacionit e rikthen çështjen në Gjykatën e Apelit në Venecia, e cila do të vlerësojë sërish kualifikimin juridik të veprës penale.
Gjatë seancave gjyqësore kanë dalë dëshmi të rëndësishme. Djali i autorit, Josef Mossali, deklaroi se i ati i kishte kërkuar të siguronte një alibi të rreme dhe të fshinte të dhënat nga kamerat e sigurisë. Një ish-punonjës i servisit dëshmoi se ditën e krimit, më 29 gusht 2022, kishte ndjerë një erë të fortë pastruesish kimikë në ambientet e punës, ndërsa vuri re sjellje të pazakonta te pronari i tij. Nga ana tjetër, Cristiano Mossali i ka mohuar akuzat gjatë gjithë procesit, duke u shprehur se nuk ka lidhje me vdekjen e shtetasit nga Kosova. Prokuroria, e cila kishte kërkuar burgim të përjetshëm, pritet të parashtrojë sërish argumentet mbi planifikimin e vrasjes në procesin e ardhshëm.
Përditësime
Hetimet zbardhën detaje të reja tronditëse mbi vrasjen e Nexhat Ramës. Autopsia konfirmoi se viktima u ekzekutua me plumb në kokë. Autorët transportuan trupin e pajetë me makinën e viktimës, të cilën më pas e dogjën për të fshehur gjurmët. Vendngjarja është lokalizuar zyrtarisht në një servis në Cologne të Breshias.