Drejtori i Përgjithshëm i Doganave, Besmir Beja, priti më 30 mars 2026 Ambasadorin e Mbretërisë së Bashkuar në Shqipëri, Nicholas Abbott, në një takim ku u diskutua forcimi i bashkëpunimit dypalësh në fushën doganore dhe sigurinë kufitare.
Gjatë bisedës, Beja vlerësoi mbështetjen e vazhdueshme të Mbretërisë së Bashkuar për Administratën Doganore Shqiptare. Ai theksoi se partneriteti me institucionet britanike ka qenë thelbësor në rritjen e kapaciteteve operacionale dhe modernizimin e procedurave të kontrollit. Beja nënvizoi bashkëpunimin me struktura si HM Revenue and Customs dhe programet e Home Office International Operations, veçanërisht në teknologji dhe shkëmbim informacioni.
Ambasadori Abbott vlerësoi progresin e Doganës Shqiptare dhe shprehu gatishmërinë për thellimin e bashkëpunimit. Ai deklaroi se Shqipëria mbetet partner i rëndësishëm për Mbretërinë e Bashkuar në adresimin e sfidave të përbashkëta, si lufta kundër kontrabandës, trafiqeve të paligjshme dhe forcimi i kontrollit kufitar. Abbott theksoi rëndësinë e projekteve të përbashkëta për rritjen e sigurisë dhe lehtësimin e tregtisë së ligjshme.
Bashkëbiseduesit u ndalën te rezultatet konkrete të bashkëpunimit ndër vite, duke përfshirë zbatimin e sistemeve inteligjente të monitorimit në pikat e kalimit kufitar dhe operacionet e përbashkëta në Portin e Durrësit. Këto kanë kontribuar në parandalimin e aktiviteteve të paligjshme dhe rritjen e efektivitetit të kontrolleve.
Palët diskutuan nevojën për intensifikimin e shkëmbimit të informacionit dhe përdorimin e teknologjive të avancuara për analizën e riskut, në funksion të sfidave të reja në siguri dhe tregti ndërkombëtare. Takimi konfirmoi nivelin e lartë të bashkëpunimit mes institucioneve shqiptare dhe britanike.