Drejtuesit e futbollit gjerman kanë hedhhur poshtë hipotezën e një bojkoti të mundshëm të Botërorit 2026, të cilin do ta organizojnë SHBA, Kanadaja dhe Meksika. Kjo deklaratë erdhi në një periudhë tensionesh politike mes SHBA-së dhe Evropës.
Presidenti i Ligës Gjermane të Futbollit (DFL), Hans-Joachim Watzke, e përkufizoi diskutimin si të pavend në këtë fazë. "Nuk mendoj se është momenti për të folur. Nëse një ditë do të jetë, atëherë do të diskutojmë, por tani gjithçka është e parakohshme", tha ai. Watzke shtoi se nuk ka perceptuar një debat të vërtetë, por vetëm qëndrime individuale.
Ky vlerësim u konfirmua nga shefi ekzekutiv i Bayern Munich-ut, Jan-Christian Dreesen, i cili foli për zëra të izoluar. Ai nënvizoi se linja e Federatës Gjermane të Futbollit (DFB) është e qartë dhe kujtoi se "nuk kemi parë kurrë një botëror të bojkotuar". Dreesen përmendi Botërorin 2018 në Rusi, të zhvilluar katër vjet pas aneksimit të Krimesë, ku Gjermania mori pjesë pa probleme. "Sporti duhet të përqendrohet te futbolli, gjeopolitika bëhet diku tjetër", deklaroi ai.
Diskutimet për bojkotin lindën nga tensionet politike, veçanërisht pozicioni i presidentit Donald Trump për Groenlandën dhe emigracionin. Në ambientet politike ka pasur kritika, por pa kërkesa formale për bojkot. Së fundmi, zëvendëspresidenti i DFB-së dhe presidenti i St. Pauli-së kërkoi hapjen e një debati për pjesëmarrjen. Megjithatë, futbollistët dhe drejtuesit e Bundesligës kanë mbajtur një qëndrim të kujdesshëm.
Përditësime
Ministrja e Shtetit për Sportin, Christiane Schenderlein, deklaroi se qeveria gjermane nuk merr pjesë në debatet për bojkotimin e Botërorit 2026. Vendimet i takojnë organizatave sportive.
- Ekipi gjerman stërvitet në Universitetin Wake Forest, të cilin Nagelsmann e cilësoi "super mbresëlënës", duke lejuar lojtarët të luajnë edhe basketboll.
- Gjermania luan ndeshjen e fundit përgatitore kundër SHBA-së në Çikago më 6 qershor.
- Në grup, Gjermania përballet me Curaçaon, Bregun e Fildishtë dhe Ekuadorin.