Jürgen Hardt, zëdhënës i politikës së jashtme i grupit parlamentar CDU/CSU dhe bashkëpunëtor i afërt i kancelarit Friedrich Merz, nuk përjashtoi mundësinë e bojkotit të Kupës së Botës FIFA 2026 nga Gjermania. Turneu do të zhvillohet në SHBA, Kanada dhe Meksikë. Kjo deklaratë erdhi si reagim ndaj planeve të presidentit amerikan Donald Trump për vendosjen e kontrollit mbi Groenlandën, territor autonom danez.
Hardt e cilësoi bojkotin si "masë ekstreme" për të detyruar administratën Trump të heqë dorë nga pretendimet. "Ne e kuptojmë sa e rëndësishme është kjo Kupë Bote për Trumpin", deklaroi ai në një koment për Bild, sipas raportimeve të Welt. Tensionet u përshkallëzuan pas ndërhyrjes ushtarake amerikane në Venezuelë, çka rriti shqetësimet evropiane për përdorimin e forcës nga SHBA.
Kritika ndaj FIFA-s
Ish-presidenti i UEFA-s, Michel Platini, kritikoi ashpër presidentin aktual të FIFA-s, Gianni Infantino, në një intervistë për The Guardian. Platini akuzoi Infantino-n për stil menaxhimi autokratik dhe besnikëri të tepruar ndaj "të pasurve dhe të fuqishmëve". "Fatkeqësisht, pas pandemisë, Infantino po bëhet gjithnjë e më shumë një autokrat. Ka më pak demokraci në FIFA sesa gjatë kohës së Blatter-it", u shpreh ai.
Kritikat lidhen edhe me vendimin e FIFA-s për t’i dhënë Trump-it një "Çmim të Paqes", veprim që shumë e shohin si favorizim politik në mes të tensioneve ndërkombëtare.