Presidenti i SHBA-së, Donald Trump, ka reaguar ndaj çmimeve të biletave për ndeshjen e parë të kombëtares amerikane kundër Paraguait në Kupën e Botës 2026. Në një prononcim për New York Post, ai u shpreh i habitur nga shifra prej rreth 1.000 dollarësh për një biletë në stadiumin SoFi të Los Anxheles, më 12 qershor 2026.
"Nuk isha në dijeni të kësaj shifre. Sigurisht që do të doja të isha atje, por sinqerisht, as unë nuk do ta paguaja atë shumë", deklaroi Trump. Ai theksoi shqetësimin për klasën punëtore dhe mbështetësit e tij, si banorët e Queens-it dhe Brooklyn-it, për të ndjekur ndeshjen nga stadiumi. "Do të doja që njerëzit që votuan për mua të kishin mundësinë të ishin aty", shtoi ai.
Kupa e Botës 2026 zhvillohet nga 11 qershori deri më 19 korrik në SHBA, Meksikë dhe Kanada, me 48 skuadra pjesëmarrëse. FIFA ka përcaktuar çmimet sipas popullaritetit të skuadrave dhe interesit të pritshëm, ndryshe nga edicionet e mëparshme me tarifa fikse. Në platformën zyrtare të rishitjes, FIFA merr 30% komision (15% nga blerësi dhe 15% nga shitësi).
Presidenti i FIFA-s, Gianni Infantino, ka mbrojtur çmimet, duke thënë se disa bileta kushtojnë më pak se ndeshjet e kolegjit në SHBA dhe se janë shitur rreth 5 milionë bileta. Trump e vlerësoi turneun si sukses të madh, pavarësisht kritikave për çmimet e larta nga tifozët dhe opinioni publik.