Donald Trump, presidenti amerikan, ka kritikuar çmimet e larta të biletave për ndeshjen hapëse të SHBA-së në Botërorin e futbollit.
Në një intervistë telefonike për gazetën New York Post, ai tha se as vetë nuk do ta paguante atë shifër.
Ndeshja midis SHBA-së dhe Paraguajt zhvillohet më 12 qershor në SoFi Stadium të Los Angeles. Çmimet e biletave për këtë takim fillojnë nga 1000 dollarë.
"Nuk isha në dijeni të asaj shifre. Do të më pëlqente të isha, por të them të vërtetën, as unë nuk do ta paguaja atë shifër", deklaroi Trump.
Ai shtoi: "Nuk e kam marrë ende lajmin, por do të duhet të hedh një sy". Presidenti u shpreh i zhgënjyer që klasa punëtore amerikane, pjesë e bazës së tij elektorale, nuk mund ta ndjekë Botërorin për shkak të çmimeve të larta.
"Do të më pëlqente që njerëzit që kanë votuar për mua të kishin mundësinë që të ishin", nënvizoi Trump. Megjithatë, ai theksoi se Botërori po rezulton sukses.