Drena Kusari, shqiptare nga Gjakovë, Kosovë, ka nisur punën si Corporate Vice President dhe General Manager në Microsoft.
Njoftimin e bëri përmes një postimi në LinkedIn më 18 mars 2026, ku shkroi: “Jam e lumtur të ndaj se po filloj një pozitë të re si Corporate Vice President dhe General Manager në Microsoft!”. Ky pozicion ndodhet midis niveleve më të larta drejtuese në strukturën e kompanisë.
Ajo lindi dhe u rrit në Gjakovë. Pas luftës në Kosovë, u shpërngul në Shtetet e Bashkuara në vitin 1999, ku përfundoi vitin e fundit të shkollës së mesme. Puna e saj e parë ishte si interprete dhe punonjëse në terren për organizatën Save the Children menjëherë pas luftës.
Ajo ka diplomuar në dy drejtime, Ekonomi dhe Diplomaci, në Occidental College në SHBA, si dhe ka marrë titullin MBA nga Harvard Business School.
Para ardhjes në Microsoft, karriera e saj përfshin role në kompani globale:
- Në Goldman Sachs, si analiste financiare;
- Në McKinsey & Company, si konsulente strategjie për kompani Fortune 500;
- Në Lyft, si General Manager për rajonin Southwest dhe Hawaii, gruaja e parë në këtë pozicion;
- Në Bumble, për strategji dhe zhvillim biznesi.
Karriera e saj është ndërtuar në ekosistemin e Silicon Valley dhe në kompani të mëdha ndërkombëtare.