Kompania amerikane Microsoft ka zyrtarizuar një valë të gjerë shkurtimesh të fuqisë punëtore, duke prekur 4,800 pozicione në nivel global me efekt të menjëhershëm. Ky vendim është pjesë e një procesi ristrukturimi të ndërmarrë për të optimizuar kostot operacionale pas rezultateve financiare të vlerësuara si zhgënjyese.
Sektori i lojërave Xbox është ndër më të prekurit, ku vetëm në fazën fillestare do të eliminohen 1,600 vende pune. Sipas njoftimit zyrtar të kompanisë me seli në Redmond, procesi i shkurtimeve në këtë sektor do të vazhdojë, duke planifikuar eliminimin e 1,600 vendeve të tjera deri në përfundim të vitit fiskal 2027, çka e çon në 6,400 numrin e përgjithshëm të pozicioneve të prekura në këtë degë të biznesit. Pjesa tjetër e largimeve do të ndikojë ekipet komerciale të korporatës.
Në një postim në blogun zyrtar, menaxhmenti i Microsoft theksoi se këto ndryshime nuk janë rrjedhojë e zëvendësimit të punonjësve nga sistemet e Inteligjencës Artificiale, duke hedhur poshtë spekulimet mbi automatizimin si shkak për vendimin. Gjithashtu, kompania njoftoi se mbi 30% e punonjësve që kishin të drejtë të largoheshin, kanë zgjedhur të përfitojnë nga një program vullnetar i daljes në pension.