Pas shortit të hedhur nga UEFA në Nyon të Zvicrës, kampionia e Kosovës në futsall, Drenica, ka mësuar kundërshtarët për raundin paraeliminator të Ligës së Kampionëve për edicionin 2025/26. Ekipi kosovar do të jetë pjesë e Grupit D.
Kundërshtarët e Drenicës në këtë fazë janë:
• Ujpest FC (Hungari)
• S.S. Murata (San Marino)
• Sakarya Karasu 1933 SK (Turqi)
Ndeshjet e këtij raundi do të zhvillohen në format turneu në një vend organizues, nga data 25 deri më 30 gusht 2025. Çdo skuadër do të zhvillojë nga tri ndeshje gjithsej.
Sipas rregullores, kualifikimin në raundin kryesor (Main Round) e sigurojnë fituesit e tetë grupeve, të cilëve do t'u bashkohen skuadrat me koeficient më të lartë në renditjen e UEFA-s. Në varësi të numrit total të pjesëmarrësve, ekziston mundësia që të avancojnë edhe disa prej ekipeve të renditura në vendin e dytë me bilancin më të mirë.
Drenica synon një paraqitje sa më të suksesshme në debutimin e saj në garat evropiane, ndërsa klubi ka nisur përgatitjet për këto sfida.