Ndeshja e zhvilluar në stadiumin Centenary në Ta’ Qali, Maltë, u mbyll me rezultat të barabartë, duke lënë të hapur çështjen e kualifikimit për sfidën e kthimit që do të luhet në stadiumin Fadil Vokrri në Prishtinë.
Pjesa e parë e takimit përfundoi pa gola. Drita krijoi disa raste shënimi me lojtarë si Igball Jashari, Jorgo Pëllumbi, Blerim Krasniqi dhe Vesel Limaj. Nga ana tjetër, skuadra vendase shënoi një gol në minutën e 41-të me Carlo Lonardellin, i cili u anulua nga gjyqtarët për pozitë jashtë loje.
Në pjesën e dytë, ritmi i lojës u ndërpre disa herë për shkak të defekteve në sistemin e ndriçimit të stadiumit, të shkaktuara nga ndërprerjet e energjisë elektrike. Skuadra e drejtuar nga trajneri Zekirija Ramadani arriti të zhbllokonte rezultatin në minutën e 96-të, kur Liridon Balaj shënoi pas një asistimi të Blerim Krasniqit. Avantazhi zgjati deri në minutën e 102-të, kohë kur Amar Drina realizoi golin e barazimit për Florianën, duke vulosur rezultatin përfundimtar 1-1.
Formacioni i Dritës në këtë sfidë ishte:
• Portier: Faton Maloku
• Mbrojtës: Besnik Krasniqi, Altin Bytyqi, Jorgo Pëllumbi, Raddy Ovouka
• Mesfushorë: Vesel Limaj, Albert Dabiqaj
• Sulmues: Blerim Krasniqi, Kristal Abazaj, Arb Manaj, Igball Jashari
Përditësime
Ndeshja mes Dritës dhe Florianës në Ligën e Konferencës u ndërpre tri herë për shkak të defekteve në sistemin e ndriçimit, duke ndikuar drejtpërdrejt në rrjedhën e lojës.