Ndeshja e javës së katërt të Superligës së Kosovës ndërmjet Dritës dhe Drenicës u zhvillua nën frymën e një mesazhi solidarizimi për krerët e Ushtrisë Çlirimtare të Kosovës, të cilët po përballen me një proces gjyqësor në Hagë.
Pak çaste përpara fillimit të ndeshjes, futbollistët e të dyja ekipeve u shfaqën në fushën e lojës duke mbajtur pankarta ku shkruhej: “Lufta për liri ishte e drejtë dhe e pastër” dhe “Kosova ju pret!”. Në pankarta ishin vendosur gjithashtu fotografitë e figurave kryesore të UÇK-së: Hashim Thaçit, Kadri Veselit, Jakup Krasniqit dhe Rexhep Selimit.
Ky solidarizim vjen pak ditë përpara organizimit të “Marshit për Liri”, i cili është paralajmëruar të mbahet më 12 shtator, nga ora 14:00, në sheshin “Skënderbeu” në Prishtinë. Sa i përket aspektit sportiv, ndeshja ndërmjet Dritës dhe Drenicës përfundoi me rezultatin e barabartë 0-0.