Dritan Demiraj, ish-ministër i Brendshëm, në një lidhje direkte me emisionin "Off the Record" në A2 CNN, të moderuar nga Andrea Danglli, u shpreh se Sali Berisha ka nisur të mendojë largimin nga drejtimi i Partisë Demokratike.
Sipas tij, Berisha nuk duhet të largohet në këtë fazë, pasi një veprim i tillë paraqet rrezik shpërbërjeje për PD-në. Demiraj theksoi se brenda partisë ekzistojnë rreth 10 figura që synojnë postin e kryetarit dhe kërkoi një "operacion fshesa" për të larguar drejtuesit që duhen pensionuar.
"Partia Demokratike, u bënë afërsisht 33 vite që drejtohet nga doktor Sali Berisha dhe përfaqësuesit e tij. Një pjesë e madhe e përfaqësuesve në Parlamentin shqiptar janë njerëz të cilët duhet të ishin pensionuar", tha ai.
Demiraj nënvizoi se ka ardhur koha që PD-ja të mendojë për të ardhmen, për shkak të kohës së gjatë në drejtim dhe moshës biologjike të Berishës. Partia duhet të tregojë maturi dhe përgjegjësi në zgjedhjet e ardhshme, për të unifikuar radhët, rritur besimin te populli shqiptar, afruar pjesën gri dhe krijuar kushtet për të drejtuar Shqipërinë.
"Ka një mision që të unifikojë sa më shumë, të rrisë besimin te populli shqiptar, të afrojë sa më shumë atë që njihet si pjesa gri dhe të krijojë kushtet që në zgjedhjet më të afërta të jetë e mundshme të drejtojë Shqipërinë", shtoi Demiraj.