Autoritetet lokale në Kurdistanin irakian kanë njoftuar se rajoni i Erbilit është goditur nga disa dronë të ardhur nga Irani. Sulmet janë regjistruar në zona të ndryshme të provincës, duke shkaktuar shpërthime, mirëpo deri në këto çaste nuk janë raportuar dëme të konsiderueshme materiale apo humbje jete.
Sipas informacioneve të para, ky veprim konsiderohet si një zgjerim i perimetrit të sulmeve nga ana e Iranit ndaj shteteve fqinje, si kundërpërgjigje ndaj veprimeve të Shteteve të Bashkuara të Amerikës. Incidenti ndodh në një periudhë tensionesh të larta në Lindjen e Mesme, të cilat po rrisin rrezikun e shtrirjes së konfliktit në territore të tjera.
Aktualisht, autoritetet kurde kanë nisur verifikimet në terren për të përcaktuar pasojat e sakta të sulmit, ndërsa ende nuk janë publikuar detaje mbi objektivat specifike të goditura. Rajoni autonom i Kurdistanit irakian ka qenë edhe në të kaluarën shënjestër e sulmeve të ngjashme me raketa dhe dronë gjatë periudhave të rritjes së tensioneve midis Iranit dhe ShBA-së.