Katër dronë goditën aeroportin e Basrës dhe dy objekte nafte në Irakun jugor, sipas një zyrtari të sigurisë që foli për AFP-në franceze.
Një dron u rrëzua në terminalin e ngarkesave të aeroportit të Basrës. Dy dronë të tjerë goditën objektet e një kompanie amerikane në kompleksin e naftës Bourgesiya. Droni i katërt goditi fushën e madhe të naftës Rumaila, ku operon gjigandi britanik i energjisë BP.
Në të njëjtën kohë, grupi francez i energjisë TotalEnergies i ka kërkuar stafit të tij të huaj të tërhiqen urgjentisht nga projektet në Basra, sipas burimeve në sektorin e naftës irakiane. Vendimi u mor pas sulmeve iraniane në rajon, të cilat pasuan fillimin e fushatës ushtarake të Shteteve të Bashkuara dhe Izraelit kundër Iranit.
TotalEnergies nuk pranoi të komentojë mbi zhvillimet. Kompania kishte njoftuar të martën se po përgatit kthimin e familjeve të punonjësve të saj nga rajoni për shkak të përkeqësimit të situatës së sigurisë.