Një dron i paidentifikuar shpërtheu të shtunën, rreth orës 08:10, në territorin e Bullgarisë, në afërsi të kufirit me Rumaninë. Mjeti fluturues ra rreth 1 kilometër larg një stacioni kompresor të gazsjellësit Trans-Ballkanik, pranë ish-pikës kufitare të Kardamit. Autoritetet bullgare, përfshirë kryeministrin Rumen Radev, konfirmuan se nga shpërthimi nuk ka pasur persona të lënduar apo dëme në infrastrukturë.
Sipas deklaratave zyrtare, zhurma e mjetit u dëgjua fillimisht nga policia kufitare rumune, ndërsa patrullat bullgare në zonën e General Toshevo regjistruan shpërthimin e fuqishëm. Kryeministri Radev pranoi mangësitë në sistemet e zbulimit, duke theksuar se droni nuk u pikas nga radarët e asnjërit shtet gjatë fluturimit. Zona e incidentit është pjesë strategjike e Korridorit Vertikal të Gazit, që shërben për furnizimin e vendeve të Evropës Juglindore dhe Qendrore.
Pas kësaj ngjarjeje, autoritetet bullgare kanë ndërmarrë masa të shtuara sigurie, duke rishpërndarë forcat e Policisë Kufitare dhe duke forcuar mbrojtjen e objekteve strategjike. Ministria bullgare e Mbrojtjes kishte rritur më herët vigjilencën pas disa incidenteve të raportuara në Rumaninë fqinje, ku gjatë fundit të korrikut u rrëzuan tre dronë, njëri prej të cilëve i tipit Shahed, të përdorur nga forcat ruse në luftën në Ukrainë. Bullgaria pritet ta diskutojë këtë incident në mbledhjen e ardhshme të Këshillit të Atlantikut të Veriut.