Pas shpalljes së aktgjykimit nga Dhomat e Specializuara të Kosovës në Hagë ndaj ish-krerëve të Ushtrisë Çlirimtare të Kosovës (UÇK), artistet shqiptare Dua Lipa dhe Rita Ora kanë reaguar përmes rrjeteve sociale.
Dua Lipa ka publikuar në Instagram logon e UÇK-së me mbishkrimin "Liria ka emër". Ajo ka ndarë gjithashtu të dhëna për pasojat e luftës në Kosovë, duke përmendur rreth 1 milion refugjatë, 11 mijë të vrarë, 1 mijë e 24 fëmijë të vrarë, 20 mijë persona të dhunuar dhe 1 mijë e 600 të zhdukur.
Rita Ora ka rishpërndarë në Instagram një imazh nga faqja "Image of Kosovo" me emblemën e UÇK-së dhe mesazhin: "Duke luftuar për Kosovën që sot e quajmë shtëpi". Në një postim tjetër, ajo ka publikuar një fotografi të sajën duke formuar simbolin e shqiponjës dykrenare, për të shprehur lidhjen me rrënjët shqiptare.
Ky reagim pason vendimin e trupit gjykues, i cili shpalli fajtorë katër ish-krerët e UÇK-së për krime lufte. Sipas vendimit:
- Hashim Thaçi: 25 vjet burgim
- Jakup Krasniqi: 25 vjet burgim
- Kadri Veseli: 18 vjet burgim
- Rexhep Selimi: 13 vjet burgim
Në këto dënime është llogaritur edhe periudha e kaluar në paraburgim, e cila për të akuzuarit ka qenë rreth gjashtë vjet. Ky aktgjykim është i shkallës së parë dhe ndaj tij mund të ushtrohet ankesë, ndërsa verdikti ka nxitur reagime të shumta në Kosovë, Shqipëri dhe diasporë.
Përditësime
Këngëtarja Dua Lipa iu bashkua reagimeve duke publikuar mesazhin 'Liria ka emër'. Ajo solli të dhëna specifike mbi pasojat e luftës, duke përmendur dëbimin e më shumë se 1 milion refugjatëve shqiptarë. Postimet e saj u shpërndanë fillimisht nga babai i saj, Dukagjin Lipa.
Dua Lipa ka shpërndarë qëndrimin e babait të saj, Dukagjin Lipa, i cili thekson se askush nuk ka të drejtë të njollosë luftën për liri dhe Ushtrinë Çlirimtare të Kosovës. Kjo deklaratë vjen pas konfirmimit zyrtar se katër ish-krerët e UÇK-së janë dënuar me gjithsej 81 vite burgim. Gjatë këtij procesi, u theksua bilanci tragjik i luftës, ku përveç dëbimit të rreth një milion njerëzve, mbetën të vrarë 11 mijë civilë.