Përballë një krize të thellë në sektorin e turizmit, qeveria e Dubait ka prezantuar një skemë nxitëse që kthen banorët në ambasadorë për promovimin e qytetit. Nisma, e njohur si "Dubai Invite", u mundëson shtetasve dhe rezidentëve mbi 18 vjeç, të cilët zotërojnë një kartë identiteti të vlefshme (Emirates ID), të përfitojnë pako shpërblyese për ftesat e bëra ndaj vizitorëve të huaj.
Sipas rregullores, çdo rezident mund të nominojë deri në pesë persona, të cilët nuk duhet të jenë banorë të Emirateve të Bashkuara Arabe dhe duhet të kenë një vizë turistike të vlefshme për periudhën ndërmjet 20 korrikut dhe 31 tetorit 2026. Shpërblimi, që arrin vlerën e rreth 700-720 eurove ose 816 dollarëve, nuk jepet në formë monetare, por përfshin përvoja gastronomike, qëndrime në hotele dhe hyrje në atraksione turistike.
Kjo masë pason një seri ndërhyrjesh financiare, përfshirë pezullimin e taksës së hotelit për natë dhe heqjen e tarifës komunale prej 7% në restorante dhe hotele, të cilat po përballen me rënie të ndjeshme të të ardhurave. Raportimet tregojnë se shkalla e zënies së hoteleve ka rënë në nivelet 15-20%, ndërsa shumë biznese kanë qenë të detyruara të ulin çmimet deri në 45% për të tërhequr vizitorë. Disa hotele madje kanë ndërprerë aktivitetin, siç është rasti i hotelit "Burj Al Arab", që ka njoftuar një mbyllje 18-mujore për rinovim.
Industria e turizmit në Dubai pësoi një goditje të rëndë pas përshkallëzimit të konfliktit rajonal dhe sulmeve me raketa e dronë në rajon, të cilat ndikuan edhe në mbylljen e përkohshme të Aeroportit Ndërkombëtar të Dubait në muajin mars. Ky stanjacion vjen pas një viti rekord në 2025, kur qyteti mirëpriti afro 20 milionë turistë. Aktualisht, kriza në sektor ka shkaktuar shkurtime të vendeve të punës në masën 15-20%.