Legjenda polake e futbollit, Jerzy Dudek, ka dhënë komente për sfidën e gjysmëfinales së play-off-it për Kupën e Botës 2026, ku Polonia do të përballet me Shqipërinë të enjten në stadiumin PGE Narodowy.
Dudek vlerësoi zgjedhjen e portierit Kamil Grabara, aktualisht te Wolfsburg në Bundesliga, si zëvendësues i duhur i Lukasz Skorupskit. Ai preferohet para Bartosz Drągowski. “Avantazhi i tij është vetëbesimi dhe eksperienca në Bundesliga, një kampionat shumë kërkues. Mendoj se ai është zgjedhja e duhur për të zëvendësuar Skorupskin dhe duhet të ndërtohet si titullar në ekip”, u shpreh Dudek për mediat polake.
Megjithatë, ai theksoi se rezultati nuk duhet të varet nga performanca e portierit. “Nuk duhet të jetë një ndeshje ku rezultati varet nga portieri ynë. Ne duhet të kontrollojmë lojën dhe të vendosim ritmin. Nëse portieri është heroi i ndeshjes, kjo do të na reflektojë keq. Me gjithë respektin për Shqipërinë”, deklaroi ai.
Dudek sugjeroi që Polonia të luajë me iniciativë nga minuta e parë, të dominojë lojën dhe të mos lërë hapësira për kundërshtarin. Grabara ka tre paraqitje me kombëtaren polake, me ndeshjen e fundit më 14 nëntor të vitit të kaluar në barazimin 1-1 ndaj Holandës në eliminatoret e Botërorit.