Lëvizja Vetëvendosje ka reaguar zyrtarisht lidhur me pretendimet për përfshirjen e saj si subjekt politik në protestat anti-qeveritare që po mbahen prej 23 ditësh në Tiranë. Në një prononcim për mediat, anëtari i Këshillit të Përgjithshëm, Enver Dugolli, theksoi se kjo forcë politike nuk ka asnjë rol në organizimin apo mbështetjen e këtyre tubimeve.
"Vetëvendosje nuk ka të bëjë asgjë me këtë protestë. Disa aktivistë ose eksponentë solidarizohen me kërkesat e drejta të qytetarëve, por nuk bëhet fjalë për rol të partisë", deklaroi Dugolli. Ai shtoi se personalisht është në mbështetje të revoltës qytetare dhe i bëri thirrje kryeministrit Edi Rama që të përmbahet nga gjuha e përdorur ndaj subjektit të tyre.
Sipas Dugollit, kreu i qeverisë shqiptare duhet të reflektojë dhe të japë llogari përballë shqetësimeve të qytetarëve, në vend që të komentojë pjesëmarrjen e figurave të Vetëvendosjes.
Kjo përgjigje vjen pas qëndrimit të mbajtur nga kryeministri Edi Rama, i cili në një reagim të mëparshëm kritikoi pjesëmarrësit nga Kosova dhe Maqedonia e Veriut në këto protesta. Rama i etiketoi disa prej tyre si të përfshirë në një "çorbë dreqërish", ndërsa bëri një dallim të qartë duke theksuar se nuk e konsideron kryeministrin e Kosovës, Albin Kurti, përgjegjës për këto veprime.