Deputeti i Lëvizjes Vetëvendosje (LVV), Enver Dugolli, foli për procesin e zgjedhjes së presidentit të ri të Kosovës në emisionin Info Nata të T7-së më 14 shkurt 2026.
Ai theksoi se pas miratimit të buxhetit të hënën do të hapet diskutimi për këtë çështje. Dugolli vuri në dukje sinjale pozitive nga partitë opozitare, që tregojnë një qasje pragmatike ndryshe nga bllokadat e mëparshme.
LVV nuk ka ende një kandidaturë definitive për ta përkrahur, për të mos dhënë përshtypjen se dëshiron ta imponojë dikë. Synimi është arritja e një konsensusi me mirëkuptim mes partive për të shmangur zgjedhjet e reja.
"Nuk ka ende një kandidaturë definitive që do ta përkrahim, për shkak se nuk po dëshirojmë që partitë opozitare ta marrin si sinjal që po dëshirojmë ta imponojmë dikë. Synojmë që ta arrijmë një konsensus me mirëkuptim që për të mos dërguar vendin në zgjedhje të reja. Mund të ketë emër tjetër, përveç të Vjosa Osmanit. Nuk mund të paragjykojmë. I kemi vetëm 66 vota, nuk i kemi mbi 80 që t’ia sigurojmë Vjosa Osmanit. Na mbetet të gjithëve që t’ia sigurojmë", deklaroi Dugolli.
Sa i përket spekulimeve për Ramush Haradinaj, ai tha se ky i fundit vetë ka deklaruar se nuk do të jetë kandidat për president. Sipas Dugollit, PDK dhe LDK nuk kanë shfaqur interesim, prandaj Haradinaj ka hequr dorë nga pretendimi.