Të dhënat e Autoritetit të Mbikëqyrjes Financiare (AMF) tregojnë se raporti mes numrit të dëmeve dhe kontratave të sigurimit të detyrueshëm motorik ra në 3,78% në vitin 2025, nga 3,89% në vitin 2024. Megjithatë, frekuenca e dëmeve ndryshonte ndjeshëm mes qarqeve.
Shkodra shënoi nivelin më të ulët, me 1,4 dëme për çdo 100 kontrata TPL. Pas saj renditet Fieri, me 1,85%, dhe më pas Dibra, me rreth 1,97 dëme për çdo 100 kontrata. Në anën tjetër, Durrësi kryesoi me 5,27%, i ndjekur nga Vlora, me 4,51%, dhe Tirana, me 4,48%.
Një matje tjetër krahason vlerën bruto të dëmeve të paguara me primet bruto të shkruara. Sipas këtij raporti, Tirana ishte në krye me 39,06%, e ndjekur nga Durrësi, me 38,54%, dhe Elbasani, me 30,5%. Nivelet më të ulëta u regjistruan në Shkodër, me 19,02%, dhe në Fier, me 19,56%. Ky raport lidhet me madhësinë e dëmeve nga aksidentet motorike, veçanërisht me dëmtimet në njerëz, të cilat rrisin kostot e dëmeve të paguara nga siguruesit.
Të dhënat e tregut tregojnë se rreziku statistikor i dëmeve ndryshon mes qarqeve. Që nga viti 2025, kompanitë e sigurimeve i llogarisin primet duke marrë parasysh disa faktorë rreziku, përfshirë qarkun ku është regjistruar automjeti.
Sipas raportimit të Monitor, diferencimi i primeve sipas këtij faktori mbetet i kufizuar dhe bazohet në të dhëna të viteve të mëparshme. Sistemi parashikon koeficient pak më të ulët për Beratin, Dibrën dhe Kukësin. Ndërkohë, në vitin 2025 frekuenca më e ulët e dëmeve u regjistrua në Shkodër, Fier dhe Dibër.
Sistemi nuk parashikon diferencime të tjera mes qarqeve, pavarësisht ndryshimeve në frekuencën e dëmeve. Koeficienti është i njëjtë për Shkodrën dhe Durrësin, ndonëse frekuenca e dëmeve në Durrës ishte pothuajse katër herë më e lartë.