Policia greke në Selanik zbuloi dy gra të vdekura, të dyja përdoruese droge, në bodrumin e banesës së një 52-vjeçari, i cili u arrestua dhe pranoi para autoriteteve përfshirjen në vdekjen e tyre.
Të dyja gratë rezultonin të zhdukura. Viktima e parë, një grua 46-vjeçare, ishte denoncuar e zhdukur nga familja në Policinë e Aleksandrupolit në shkurt 2025, pasi nuk kishin kontakt me të që nga shtatori 2024. Sipas dëshmisë së të arrestuarit, ajo vdiq më 30 tetor 2024 në bodrumin e tij, ku po konsumonin drogë bashkë me një person tjetër. Gruaja filloi të bërtiste gjatë një telefonate, moment kur 52-vjeçari dhe personi tjetër i mbuluan gojën, duke i shkaktuar asfiksi. Trupi u hodh më pas në një kazan mbeturinash.
Viktima e dytë vdiq më 24 korrik 2025 në të njëjtin bodrum pas përdorimit të drogës. Të arrestuari deklaroi se ajo "ra në gjumë dhe nuk u zgjua më", ndërsa e fshehu trupin në një papafingo në çatinë e pallatit. Autoritetet presin rezultatet e autopsisë për të përcaktuar shkaqet e sakta të vdekjes.
Hetimet u zhvilluan pasi policia konstatoi lidhjen e të dyja grave me 52-vjeçarin. Pas ndjekjes së tij, forcat e rendit kryen kontrollin në banesë dhe e arrestuan. Ekipet speciale vazhdojnë kërkimet, ndërsa pritet arrestimi i personit tjetër të pranishëm gjatë vdekjes së parë.