Pasditen e së mërkurës, më 25 shkurt 2026, qarkullimi është vështirësuar në aksin Lozhan-Moglicë-Gramsh, të caktuar si rrugë alternative pas bllokimit të aksit Librazhd-Prrenjas.
Sipas informacioneve, nga rruga e Gramshit janë lejuar të hyjnë drejt juglindjes dy kamionë, që thuhet se janë të OSHEE-së. Këta kanë hapur krahun në anë të rrugës, por për shkak të lëvizjes së lartë të mjeteve është krijuar një ngërç. Lëvizja e automjeteve po bëhet e ngadalësuar në këtë segment.
Policia e qarkullimit të Korçës ka mbërritur në vendngjarje për të siguruar hapjen totale të rrugës.
Konteksti i shembjes së rrugës
Rruga që lidh Librazhdin me Prrenjasin është shembur dhe është bërë e pakalueshme që nga 21 shkurt 2026. Kjo situatë ka izoluar zonën e juglindjes dhe ka çuar në akuza të ndërsjella mes palëve politike.
Kreu i Partisë Demokratike, Sali Berisha, ka akuzuar qeverinë e Edi Ramës për shembjen, duke e lidhur atë me korrupsionin në ndërtimin e akseve rrugore. Ndërsa kryeministri Edi Rama ka shpjeguar se shkaku është përbërja gjeologjike e zonës.
Një ditë më parë, në një konferencë për shtyp, kryetari i ARRSH-së, Ami Kozeli, ka njoftuar ndërtimin e një rruge alternative të re, si dhe shembjen dhe rindërtimin e urës së dëmtuar në këtë aks.
Përditësime
Autoritetet njoftuan rrugën alternative të plotë: Tiranë–Elbasan–Gramsh–Moglicë–Lozhan–Maliq–Korçë.
- Distanca totale: 210 km
- Koha e udhëtimit: 4-5 orë
Shembja dyshohet të jetë shkaktuar nga erozioni i vazhdueshëm dhe gërryerjet në lumin Shkumbin.
Bllokim i ri raportohet te 'Arra e Gurrës'.